15. අට්ඨාන වර්‍ගය.

1. නිච්චතූපගමන සූත්‍රය.

´´මහණෙනි, මාර්‍ගදෘෂ්ටියෙන් යුක්තවූ, (සෝවාන්වූ) පුද්ගලයෙක් යම් හේතුවක් නිසා කිසි සංස්කාරයක් නිත්‍ය වශයෙන් ගන්නේය යන මේ කාරණය හේතු රහිතයි, ප්‍රත්‍ය රහිතයි. මේ කාරණය විද්‍යමාන නොවේ. මහණෙනි, මේ කාරණය නම් විද්‍යමානවේ. (එනම්) පෘතග්ජන පුද්ගලයෙක් යම් හේතුවක් නිසා කිසි සංස්කාරයක් නිත්‍ය වශයෙන් ගන්නේය. මේ කාරණය විද්‍යමානවේ.´´

2. සුඛතූපගමන සූත්‍රය.

´´මහණෙනි, මාර්‍ගදෘෂ්ටියෙන් යුක්තවූ, (සෝවාන්වූ) පුද්ගලයෙක් යම් හේතුවක් නිසා කිසි සංස්කාරයක් සැප වශයෙන් ගන්නේය යන මේ කාරණය හේතු රහිතයි, ප්‍රත්‍ය රහිතයි. මේ කාරණය විද්‍යමාන නොවේ. මහණෙනි, මෙබඳු දෙයක් නම් විද්‍යමානවේ. (එනම්) යම් හෙයකින් පෘතග්ජන පුද්ගලයෙක් කිසි සංස්කාරයක් සැප වශයෙන් ගන්නේය. යන මේ කාරණය නම් විද්‍යමානවේ.´´

3. අත්තතූපගමන සූත්‍රය.

´´මහණෙනි, මාර්‍ගදෘෂ්ටියෙන් යුක්තවූ, (සෝවාන්වූ) පුද්ගලයෙක් තෙම යම් කිසි ධර්‍මයක් ආත්ම වශයෙන් ගන්නේය යන මේ කාරණය හේතු රහිතයි, ප්‍රත්‍ය රහිතයි. එවැනි දෙයක් විද්‍යමාන නොවේ. මහණෙනි, මේ කාරණය නම් විද්‍යමානවේ. (එනම්) යම් හෙයකින් පෘතග්ජනයෙක් කිසි ධර්‍මයක් ආත්ම වශයෙන් ගන්නේය. යන මේ කාරණය නම් විද්‍යමානවේ.´´

4. මාතුජීවිත සූත්‍රය.

´´මහණෙනි, මාර්‍ගදෘෂ්ටියෙන් යුක්තවූ, (සෝවාන්වූ) පුද්ගලයෙක් යම් හේතුවක් නිසා වැදූ මව ජීවිතයෙන් තොර කරන්නේය. යන මේ කාරණය හේතු රහිත වේ, ඒ ප්‍රත්‍ය රහිතයි. එබඳු දෙයක් දක්නට නැත. මහණෙනි, මෙබඳු දෙයක් නම් විද්‍යමානවේ. (එනම්) පෘතග්ජන තෙම යම් හෙයකින් මව ජීවිතයෙන් තොර කරන්නේය, යන මේ කාරණය නම් විද්‍යමානවේ.´´

5. පිතුජීවිත සූත්‍රය.

´´මහණෙනි, මාර්‍ගදෘෂ්ටියෙන් යුක්තවූ, (සෝවාන්වූ) පුද්ගලයෙක් යම් හේතුවක් නිසා ස්වකීය පියා ජීවිතයෙන් තොර කරන්නේය. යන මේ කාරණය හේතු රහිතයි, ප්‍රත්‍ය රහිතයි. මෙබඳු දෙයක් දක්නට නොලැබේ. මහණෙනි, මෙවැනි දෙයක් නම් දක්නට ලැබේ. (එනම්) යම් හේතුවක් නිසා පෘතග්ජනයෙක් ස්වකීය පියා ජීවිතයෙන් තොර කරන්නේය, යන මේ කාරණය නම් විද්‍යමානවේ.´´

6. අරහන්තජීවිත සූත්‍රය.

´´මහණෙනි, මාර්‍ගදෘෂ්ටියෙන් සම්පූර්‍ණවූ, (සෝවාන්වූ) පුද්ගලයෙක් තෙම යම් හේතුවක් නිසා රහත් කෙනෙකුන් ජීවිතයෙන් තොර කරන්නේය. යන මෙය හේතු රහිතයි, ප්‍රත්‍යය රහිතයි. එවැනි කාරණයක් විද්‍යමාන නොවේ. මහණෙනි, මෙබඳු දෙයක් නම් දක්නට ලැබේ. (එනම්) යම් හේතුවක් නිසා පෘතග්ජනයෙක් රහත් කෙනෙකුන් ජීවිතයෙන් තොර කරන්නේය, යන මේ දේ නම් විද්‍යමානවේ.´´

7. ලොහිතුප්පාද සූත්‍රය.

´´මහණෙනි, මාර්‍ගදෘෂ්ටියෙන් සම්පූර්‍ණවූ, (සෝවාන්වූ) පුද්ගලයෙක් යම් හේතුවක් නිසා තථාගතයන් වහන්සේගේ ශරීරයෙන් දූෂ්‍යවූ සිතින් ලේ උපදවන්නේය, යන මේ කාරණය හේතු රහිතයි, ප්‍රත්‍යය රහිතයි. එබඳු දෙයක් විද්‍යමාන නොවේ. මහණෙනි, මෙබඳු දෙයක් නම් දක්නට ලැබේ. (එනම්) යම් හේතුවක් නිසා පෘතග්ජනයෙක් තථාගතයන් වහන්සේ ගේ ශරීරයෙන් දූෂ්‍යවූ සිතින් යුක්තව ලේ උපදවන්නේය, යන මේ කාරණය නම් විද්‍යමානවේ.´´

8. සඞ්ඝභෙද සූත්‍රය.

´´මහණෙනි, මාර්‍ගදෘෂ්ටියෙන් සම්පූර්‍ණවූ, (සෝවාන්වූ) පුද්ගලයෙක් යම් හේතුවක් නිසා සඞ්ඝයා භෙද කරන්නේය යන මේ කාරණය හේතු රහිතයි, ප්‍රත්‍යය රහිතයි. එබඳු දෙයක් විද්‍යමාන නොවේ. මහණෙනි, මෙබඳු දෙයක් නම් විද්‍යමාන වේ. (එනම්) යම් හෙයකින් පෘතග්ජනයෙක් සඞ්ඝයා බිඳුවන්නේය, යන මේ කාරණය නම් දක්නට ලැබේ.´´

9. අඤ්ඤසත්‍ථාරුදේදස සූත්‍රය.

´´මහණෙනි, මාර්‍ගදෘෂ්ටියෙන් සම්පූර්‍ණවූ, (සෝවාන්වූ) පුද්ගලයෙක් යම් හෙයකින් අන්‍ය ශාස්තෘවරයෙක් අදහන්නේය, යන මේ කාරණය හේතු රහිතයි, ප්‍රත්‍යය රහිතයි. එබඳු දෙයක් විද්‍යමාන නොවේ. මහණෙනි, මෙබඳු දෙයක් නම් දක්නට ලැබේ. (එනම්) යම් හෙයකින් පෘතග්ජනයෙක් අන්‍ය ශාස්තෘවරයෙකු විශ්වාස කරන්නේය, යන මේ කාරණය නම් විද්‍යමානවේ.´´

10. එකසම්මාසම්බුද්ධ සූත්‍රය.

´´මහණෙනි, එක ලෝක ධාතුවෙක්හි අර්හත්වූ සම්‍යක් සම්බුඳුවරයන් වහන්සේලා දෙනමක් පෙර පසු නොව (එකවර) උපදින්නාහුය යන මේ කාරණයක් වේද, ඒ හේතු රහිතයි, ප්‍රත්‍යය රහිතයි. ඒ කාරණය විද්‍යමාන නොවේ. මහණෙනි, මෙබඳු දෙයක් නම් ඇත්තේය. (එනම්) යම් හෙයකින් එක ලෝක ධාතුවෙක්හි අර්හත්වූ එකම සම්බුදුවරයෙක් උපදනේය යන මේ කාරණය වනාහි විද්‍යමානවේ.´´

11. එකචක්කවත්ති සූත්‍රය.

´´මහණෙනි, එක ලෝක ධාතුවෙක්හි සක්විති රජවරු දෙදෙනෙක් පෙර නොව පසු නොව (එකවර) උපදනාහුය යන මේ කාරණයක් වේද, ඒ හේතු රහිතයි, ප්‍රත්‍යය රහිතයි. මේ කාරණය විද්‍යමාන නොවේ. මහණෙනි, මෙබඳු දෙයක් නම් ඇත්තේය. (එනම්) එක ලෝක ධාතුවෙක්හි එකම සක්විති රජෙක් උපදනේය යන මේ කාරණයක් වේද, ඒ වනාහි විද්‍යමානවේ.´´

12. පුරිසසම්මාසම්බොධි සූත්‍රය.

´´මහණෙනි, ස්ත්‍රියක් තොම අර්හත්වූ සම්‍යක් සම්බුදුවරයෙක් වේය යන මේ කාරණයක් වේද, ඒ හේතු රහිතයි, ප්‍රත්‍යය රහිතයි. ඒ කාරණය විද්‍යමාන නොවේ. මහණෙනි, මේ කාරණය නම් විද්‍යමානවේ. (එනම්) යම් හෙයකින් පුරුෂයෙක් අර්හත්වූ සම්‍යක් සම්බුදුවරයෙක් වේද, මේ කාරණය නම් විද්‍යමානවේ.´´

13. පුරිස චක්කවත්ති සූත්‍රය.

´´මහණෙනි, ස්ත්‍රියක් තොම සක්විති රජෙක් වේය යන මේ කාරණය හේතු රහිතයි, ප්‍රත්‍යය රහිතයි. ඒ කාරණය විද්‍යමාන නොවේ. මහණෙනි, මේ කාරණය නම් දක්නට ලැබේ. (එනම්) යම් හෙයකින් පුරුෂයෙක් සක්විති රජ වේද, මේ කාරණය නම් විද්‍යමානවේ.´´

14. පුරිසසක්කත්ත සූත්‍රය.

´´මහණෙනි, ස්ත්‍රියක් තොම ශක්‍ර ආත්මය ලබන්නීය යන මේ කාරණය හේතු රහිතයි, ප්‍රත්‍යය රහිතයි. ඒ කාරණය විද්‍යමාන නොවේ. මහණෙනි, මේ කාරණය නම් දක්නට ලැබේ. (එනම්) යම් හෙයකින් පුරුෂයෙක් ශක්‍ර ආත්මය ලබන්නේය, මේ කාරණය නම් විද්‍යමානවේ.´´

15. පුරිසමාරත්ත සූත්‍රය.

´´මහණෙනි, ස්ත්‍රියක් තොම මාරආත්මය ලබන්නීය යන මේ කාරණය, හේතු රහිතයි, ප්‍රත්‍යය රහිතයි. ඒ කාරණය විද්‍යමාන නොවේ. මහණෙනි, මේ කාරණය නම් දක්නට ලැබේ. (එනම්) යම් හෙයකින් පුරුෂයෙක් මාර ආත්මය ලබන්නේය, මේ කාරණය නම් විද්‍යමානවේ.´´

16. පුරිසබ්‍රහ්මත්ත සූත්‍රය.

´´මහණෙනි, ස්ත්‍රියක් තොම බ්‍රහ්ම ආත්මය ලබන්නීය, යන මේ කාරණය හේතු රහිතයි, ප්‍රත්‍යය රහිතයි. ඒ කාරණය විද්‍යමාන නොවේ. මහණෙනි, මේ කාරණය නම් දක්නට ලැබේ. (එනම්) යම් හෙයකින් පුරුෂයෙක් බ්‍රහ්ම ආත්මය ලබන්නේය යන මේ කාරණය නම් විද්‍යමානවේ.´´

17. කායදුච්චරිතවිපාක සූත්‍රය.

´´මහණෙනි, කාය දුශ්චරිතයෙන් ප්‍රියවූ සිත්කළුවූ මන වඩන්නාවූ විපාකයක් උපදනේයයි යම් කරුණක් වේද, ඒ හේතු රහිතයි, ප්‍රත්‍යය රහිතයි. එබඳු දෙයක් සිදු නොවන්නේය. මහණෙනි, මේ කාරණය නම් සිදුවේ. (එනම්) යම් හෙයකින් කාය දුශ්චරිතයාගේ අප්‍රියවූ, අකාන්තවූ, අමනාපවූ විපාකයක් උපදනේය යන මේ කාරණය නම් සිදු වන්නේය.´´

18. වචීදුච්චරිතවිපාක සූත්‍රය.

´´මහණෙනි, වචී (වචන) දුශ්චරිතයෙන් ප්‍රියවූ සිත්කළුවූ මන වඩන්නාවූ විපාකයක් උපදනේයයි යම් කරුණක් වේද, ඒ හේතු රහිතයි, ප්‍රත්‍යය රහිතයි. එබඳු දෙයක් සිදු නොවන්නේය. මහණෙනි, මේ කාරණය නම් සිදුවේ. (එනම්) යම් හෙයකින් වචී (වචන) දුශ්චරිතයාගේ අප්‍රියවූ, අකාන්තවූ, අමනාපවූ විපාකයක් උපදනේය යන මේ කාරණය නම් සිදු වන්නේය.´´

19. මනොදුච්චරිතවිපාක සූත්‍රය.

´´මහණෙනි, මනෝ (හිතේ) දුශ්චරිතයෙන් ප්‍රියවූ සිත්කළුවූ මන වඩන්නාවූ විපාකයක් උපදනේයයි යම් කරුණක් වේද, ඒ හේතු රහිතයි, ප්‍රත්‍යය රහිතයි. එබඳු දෙයක් සිදු නොවන්නේය. මහණෙනි, මේ කාරණය නම් සිදුවේ. (එනම්) යම් හෙයකින් මනෝ (හිතේ) දුශ්චරිතයාගේ අප්‍රියවූ, අකාන්තවූ, අමනාපවූ විපාකයක් උපදනේය යන මේ කාරණය නම් සිදු වන්නේය.´´

20. කායසුචරිතවිපාක සූත්‍රය.

´´මහණෙනි, යම් හෙයකින් කාය සුචරිතයාගේ අනිෂ්ටවූ, අප්‍රියවූ, අමනාපවූ විපාකයක් උපදනේය යන මෙය හේතු රහිතයි, ප්‍රත්‍යය රහිතයි. එවැනි කාරණයක් විද්‍යමාන නොවේ. මහණෙනි, මේ කාරණය නම් විද්‍යමානවේ. (එනම්) යම් හෙයකින් කාය සුචරිතයාගේ ඉෂ්ටවූ, කාන්තවූ, මනාපවූ විපාකයක් උපදනේය යන මේ කාරණය නම් විද්‍යමානවේ.´´

21. වචීසුචරිතවිපාක සූත්‍රය.

´´මහණෙනි, යම් හෙයකින් වචී (වචන) සුචරිතයාගේ අනිෂ්ටවූ, අප්‍රියවූ, අමනාපවූ විපාකයක් උපදනේය යන මෙය හේතු රහිතයි, ප්‍රත්‍යය රහිතයි. එවැනි කාරණයක් විද්‍යමාන නොවේ. මහණෙනි, මේ කාරණය නම් විද්‍යමානවේ. (එනම්) යම් හෙයකින් වචී (වචන) සුචරිතයාගේ ඉෂ්ටවූ, කාන්තවූ, මනාපවූ විපාකයක් උපදනේය යන මේ කාරණය නම් විද්‍යමානවේ.´´

22. මනොසුචරිතවිපාක සූත්‍රය.

´´මහණෙනි, යම් හෙයකින් මනො (හිතේ) සුචරිතයාගේ අනිෂ්ටවූ, අප්‍රියවූ, අමනාපවූ විපාකයක් උපදනේය යන මෙය හේතු රහිතයි, ප්‍රත්‍යය රහිතයි. එවැනි කාරණයක් විද්‍යමාන නොවේ. මහණෙනි, මේ කාරණය නම් විද්‍යමානවේ. (එනම්) යම් හෙයකින් මනො (හිතේ) සුචරිතයාගේ ඉෂ්ටවූ, කාන්තවූ, මනාපවූ විපාකයක් උපදනේය යන මේ කාරණය නම් විද්‍යමානවේ.´´

23. කායදුච්චරිතසමංගී සූත්‍රය.
 
´´මහණෙනි, යම් හෙයකින් කායදුශ්චරිතයෙන් යුත් පුද්ගල තෙම එය හේතු කොට ගෙන, එය ප්‍රත්‍යය කොටගෙන ශරීරය බිඳි යාමෙන් පසු මරණින් මත්තෙහි යහපත් ගති ඇත්තාවූ ස්වර්‍ග ලෝකයෙහි උපදින්නේය යන මෙය හේතු රහිතයි. ප්‍රත්‍යය රහිතයි. එවැනි කාරණයක් විද්‍යමාන නොවේ. මහණෙනි, මේ කාරණය නම් දක්නට ලැබේ. (එනම්) යම් හෙයකින් කායදුශ්චරිතයෙන් යුත් පුද්ගල තෙම එය හේතුකොටගෙන, එය ප්‍රත්‍යයකොටගෙන, ශරීරයාගේ භෙදයෙන් පසු මරණින් මත්තෙහි සැපයෙන් තොරවූ, නපුරු ගති ඇති, විකාරව වැටෙන්නාවූ නරකයෙහි උපදින්නේය යන මේ කාරණය නම් විද්‍යමානවේ.´´

24. වචීදුච්චරිතසමංගී සූත්‍රය.

´´මහණෙනි, යම් හෙයකින් වචී (වචන) දුශ්චරිතයෙන් යුත් පුද්ගල තෙම එය හේතු කොට ගෙන, එය ප්‍රත්‍යය කොටගෙන ශරීරය බිඳි යාමෙන් පසු මරණින් මත්තෙහි යහපත් ගති ඇත්තාවූ ස්වර්‍ග ලෝකයෙහි උපදින්නේය යන මෙය හේතු රහිතයි. ප්‍රත්‍යය රහිතයි. එවැනි කාරණයක් විද්‍යමාන නොවේ. මහණෙනි, මේ කාරණය නම් දක්නට ලැබේ. (එනම්) යම් හෙයකින් වචී (වචන) දුශ්චරිතයෙන් යුත් පුද්ගල තෙම එය හේතුකොටගෙන, එය ප්‍රත්‍යයකොටගෙන, ශරීරයාගේ භෙදයෙන් පසු මරණින් මත්තෙහි සැපයෙන් තොරවූ, නපුරු ගති ඇති, විකාරව වැටෙන්නාවූ නරකයෙහි උපදින්නේය යන මේ කාරණය නම් විද්‍යමානවේ.´´

25. මනොදුච්චරිතසමංගී සූත්‍රය.

´´මහණෙනි, යම් හෙයකින් මනෝ (හිතේ) දුශ්චරිතයෙන් යුත් පුද්ගල තෙම එය හේතු කොට ගෙන, එය ප්‍රත්‍යය කොටගෙන ශරීරය බිඳි යාමෙන් පසු මරණින් මත්තෙහි යහපත් ගති ඇත්තාවූ ස්වර්‍ග ලෝකයෙහි උපදින්නේය යන මෙය හේතු රහිතයි. ප්‍රත්‍යය රහිතයි. එවැනි කාරණයක් විද්‍යමාන නොවේ. මහණෙනි, මේ කාරණය නම් දක්නට ලැබේ. (එනම්) යම් හෙයකින් මනෝ (හිතේ) දුශ්චරිතයෙන් යුත් පුද්ගල තෙම එය හේතුකොටගෙන, එය ප්‍රත්‍යයකොටගෙන, ශරීරයාගේ භෙදයෙන් පසු මරණින් මත්තෙහි සැපයෙන් තොරවූ, නපුරු ගති ඇති, විකාරව වැටෙන්නාවූ නරකයෙහි උපදින්නේය යන මේ කාරණය නම් විද්‍යමානවේ.´´

26. කායසුචරිතසමංගී සූත්‍රය.

´´මහණෙනි, යම් හෙයකින් කාය සුචරිතයෙන් යුක්තවූ පුද්ගල තෙම එය මූල කාරණා (හේතු) කොට ගෙන, එය ප්‍රත්‍යය කොටගෙන ශරීරයාගේ භෙදයෙන් පසු මරණින් මත්තෙහි සැපයෙන් පහවූ, දුර්‍ගති ඇති, විකාරව වැටෙන්නාවූ නරකයෙහි උපදින්නේය යන මේ කාරණය හේතු රහිතයි. ප්‍රත්‍යය රහිතයි. දක්නට නැත. මහණෙනි, මේ කාරණය නම් දක්නට ලැබේ. (එනම්) මහණෙනි, යම් හෙයකින් කාය සුචරිතයෙන් යුක්තවූ පුද්ගල තෙම එය හේතුකොටගෙන, එය ප්‍රත්‍යයකොටගෙන, ශරීරයාගේ භෙදයෙන් පසු මරණින් මත්තෙහි යහපත් ගති ඇත්තාවූ ස්වර්‍ග ලෝකයෙහි උපදින්නේය යන මේ කාරණය නම් විද්‍යමානවේ.´´

27. වචීසුචරිතසමංගී සූත්‍රය.

´´මහණෙනි, යම් හෙයකින් වචී (වචන) සුචරිතයෙන් යුක්තවූ පුද්ගල තෙම එය මූල කාරණා (හේතු) කොට ගෙන, එය ප්‍රත්‍යය කොටගෙන ශරීරයාගේ භෙදයෙන් පසු මරණින් මත්තෙහි සැපයෙන් පහවූ, දුර්‍ගති ඇති, විකාරව වැටෙන්නාවූ නරකයෙහි උපදින්නේය යන මේ කාරණය හේතු රහිතයි. ප්‍රත්‍යය රහිතයි. දක්නට නැත. මහණෙනි, මේ කාරණය නම් දක්නට ලැබේ. (එනම්) මහණෙනි, යම් හෙයකින් වචී (වචන) සුචරිතයෙන් යුක්තවූ පුද්ගල තෙම එය හේතුකොටගෙන, එය ප්‍රත්‍යයකොටගෙන, ශරීරයාගේ භෙදයෙන් පසු මරණින් මත්තෙහි යහපත් ගති ඇත්තාවූ ස්වර්‍ග ලෝකයෙහි උපදින්නේය යන මේ කාරණය නම් විද්‍යමානවේ.´´

28. මනොසුචරිතසමංගී සූත්‍රය.

´´මහණෙනි, යම් හෙයකින් මනො (හිතේ) සුචරිතයෙන් යුක්තවූ පුද්ගල තෙම එය මූල කාරණා (හේතු) කොට ගෙන, එය ප්‍රත්‍යය කොටගෙන ශරීරයාගේ භෙදයෙන් පසු මරණින් මත්තෙහි සැපයෙන් පහවූ, දුර්‍ගති ඇති, විකාරව වැටෙන්නාවූ නරකයෙහි උපදින්නේය යන මේ කාරණය හේතු රහිතයි. ප්‍රත්‍යය රහිතයි. දක්නට නැත. මහණෙනි, මේ කාරණය නම් විද්‍යමානවේ. (එනම්) යම් හෙයකින් මනො සුචරිතයෙන් යුක්තවූ පුද්ගල තෙම එය හේතුකොටගෙන, එය ප්‍රත්‍යයකොටගෙන, ශරීරයාගේ භෙදයෙන් පසු මරණින් මත්තෙහි යහපත් ගති ඇත්තාවූ ස්වර්‍ග ලෝකයෙහි උපදින්නේය යන මේ කාරණය නම් විද්‍යමානවේ.´´

(අට්ඨාන වර්‍ගය නිමි.)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: